გამარჯობა,
მე კობა შეყილაძე ვარ, ზემო იმერეთის რეგიონის სოფელ გეზრულიდან. პროფესიით პედაგოგი და საქმიანობით ჩაის მწარმოებელი. უფრო კონკრეტულად კი ორგანული ჩაის მწარმოებელი. ალბათ სწორედ ამიტომაც ვიყავი ევროკავშირის, შვედეთის და ავსტრიის მიერ დაფინანსებული პროექტ GRETA-ს ერთ-ერთი პირველი ბენეფიციარი და ახლა უკვე თამამად შემიძლია ვთქვა, რომ გვაქვს ხანგრძლივი და წარმატებული პარტნიორული ურთიერთობის ისტორია.
ჩემი და პროექტის პირველი შემხებლობა საქართველოში ერთადერთი ბიომასერტიფიცირებელი ორგანიზაციის - „კავკასსერტის“ მიერ ინფორმაციის გაზიარებით მოხდა. გულახდილად ვიტყვი, მანამდე ფაქტიურად სანთლით ვეძებდი ინფორმაციას საქართველოში ორგანული წარმოების ხელშეწყობის შესახებ, განსაკუთრებით მაღალმთიან რეგიონში. 2019 წელს კი სასიამოვნო ინფორმაცია მივიღე, რომ სამი დონორი - ევროკავშირი, შვედეთი და ავსტრია, პროექტ GRETA-ს ფარგლებში, ორგანული წარმოების ხელშეწყობაზე აკეთებდა აქცენტს და აი აქედან დაიწყო ჩემი დიდი ხნის ჩანაფიქრების ხორცშესხმა.
არ მომერიდება და გაგიზიარებთ, აღნიშნული პროექტის ფარგლებში დონორების მიერ გაწეულმა მხარდაჭერამ გადამწყვეტი როლი ითამაშა ჩემს საქმიანობაზე. საგრანტო კონკურსის გამარჯვების შედეგად, მივიღეთ ყველა სახის დანადგარი, რაც საჭიროა პროდუქციის წარმოების სრული საოპერაციო ციკლისთვის. რომ არა ეს პროექტი, ალბათ ჯერ წარმოებაც არ მექნებოდა გამართული და ჩემი ჩანაფიქრები მხოლოდ ჩემთვის იარსებებდა.
ჩემი წარმოდგენით, დახმარება დანადგარების მიღებით შემოიფარგლებოდა. თუმცა, კიდევ დიდი აღმოჩენები და ახალი შესაძლებლობების ათვისება მელოდა წინ. ამით იმის თქმა მინდა, რომ დამატებით მნიშვნელოვანი ხელშეწყობა მივიღე პროდუქციის შეფუთვიდან დაწყებული, მისი პოპულარიზაციისთვის საჭირო აქტივობების განხორციელებაზე, როგორც შიდა, ასევე საერთაშორისო ბაზრისთვის. ფაქტიურად გარდამტეხი ეტაპი იყო გამოფენები, სადაც ახალ, უცხოურ ბაზარს გავაცანით ქართული ჩაი. ეს დიდი შესაძლებლობა და გამოცდილება იყო.
მიზანმიმართულად ვახსენე ხანგრძლივი პარტნიორული ურთიერთობა, რადგან ჩემი საქმიანობის ხელშეწყობა ამით არ მთავრდება. მონაწილეობა მივიღე დონორების დაფინანსებით ორგანიზებულ საოცრად საინტერესო და საჭირო ტრენინგებში, როგორც ჩაის ბიოწარმოების ტექნიკების შესახებ, ასევე ჩემი ბიზნეს საქმიანობის სტრატეგიულად სწორად მართვის ტრენინგებში. ბიოსერტიფიცირების კუთხითაც მნიშვნელოვანი მხარდაჭერა გვქონდა, 2 წელიწადის განმავლობაში დაგვიფინანსდა ბიოსერტიფიცირების პროცესი. ჩვენს შემთხვევაში პლანტაციების ბიო სერტიფიცირება 23 ჰექტარზე იყო საჭირო და ეს საკმაოდ მნიშვნელოვანი ხელშეწყობა იყო.
რომ შევაჯამო, ევროკავშირის, შვედეთის და ავსტრიის მიერ გაწეული მხარდაჭერა სამი ძირითად კატეგორიაში შეიძლება გაერთიანდეს: (1) წარმოების სრულყოფილად გამართვა, თანამედროვე დანადგარებით აღჭურვა და ორგანული სტატუსის სტაბილურად შენარჩუნება; (2) პროდუქტის შეფუთვა და მისი პოპულარიზაციისთვის სხვადასხვა მარკეტინგული აქტივობების მხარდაჭერა, როგორც შიდა ასევე, საერთაშორისო ბაზრებზე; (3) ყველა საჭირო უნარ-ჩვევების შეძენა, როგორც სექტორული, ასევე პროდუქციის პოპულარიზაცია და გაყიდვების გაზრდისთვის კუთხით.
შემიძლია ახლავე გაგიზიაროთ რეალური შედეგი, რაც ამ ხელშეწყობით მივაღწიე. თუ თავიდან მოსავალი იყო 500 კილოგრამი, შემდგომ 1000 კგ და ა.შ. დღესდღეობით უკვე 2 ტონას აღწევს. შეიძლება ითქვას, რომ პროექტის ფარგლებში წარმოება გაიზარდა 50 ჯერ. მგონი შთამბეჭდავი შედეგია, ყოველ შემთხვევაში ჩემი გადმოსახედიდან დანამდვილებით ასეა.. და კიდევ ერთხელ ხასგასმით ვიტყვი: რომ არა ეს პროექტი, ალბათ რეალური ქმედებების განხორციელება ძალიან გამიჭირდებოდა.
დიდი იმედი მაქვს, რომ ჩემი ისტორია სხვა მეწარმეებისთვისაც მოტივაციის მიმცემი იქნება. საკუთარ გამიცდილებაზე დაყრდნობით მცირედ რჩევასაც გავუზიარებდი: რა ნიშასაც აირჩევენ, უმნიშვნელოვანესია ხარისხი, განსაკუთრებით ბიო მიმართულებაში. და ბოლოს განათლება, ეს არის უმნიშვნელოვანესი, სხვაგვარად წარმატება ვერ მოვა. მოამავალს იმედიანად ვუყურებთ, გვინდა ბოლომდე მივყვეთ ამ საქმეს და უფრო გავფართოვდეთ. გეგმაში გვაქვს ასევე აგროტურიზმის მიმართულებით მუშაობაც. სრული მზაობა გვაქვს ახალი პარტნიორული თანამშრომლობისთვის და ხელმისაწვდომი ვარ სოციალური ქსელის მეშვეობით - Koba Sheyiladze. დროებით და წარმატებას გისურვებთ!
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განთვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის